interview with satish ray

INTERVIEW WITH SATISH RAY

SATISH RAY – Is an Actor, Director, & Writer. He is currently working with – TVF (The Viral Fever). Last year Satish launched his YouTube channel. His YouTube channel has more than 2 lakh subscribers.

Satish Plays different characters in his YouTube videos. Some famous characters played by him are:

  • Imaandar Sharma
  • Alpha Pandey
  • Babban Bhola
  • Motivation Maheshwari
  • Pappu Positive

Agar aap imaandari se mehnat karte ho. Toh kismat bhi aapka puri imaandari se saath deti hai. Aur iska example hai Satish Ray aka (Imaandaar Sharma).

Work Links.

Imaandar Boyfriend.
Imaandar Engineer.
Imaandar Gym Member.
Imaandar Beta.
Imaandar Teacher.
HowTo Impress A Girl | Babban Bhola.
Aliens & Time Travel.
Sting Operation on GF’s Best Friend.

Interview

1. What is your birthplace? 

Satish – Bihar mein ek town hai usse 30 km dhoor hai Rajauli wahan se hoon main. 10th ke baad 11th aur 12th ke liye main Patna gaya tha. Aur phir school ke baad mein B.TECH karne ke liye gaya tha Faridabad.

2. How do you find an interest in writing, acting and direction?

Satish – Bachpan se hi yaar mujhe stories padhna bohot accha lagta tha. Papa joh books padhte the woh books bhi main padhta tha. Papa mana karte the ki yeh novel hai bacche nahi padh sakte but main chup kar padh leta tha. So yeh sab books padhne ke baad se hi maine decide karliya tha ki mujhe writer bana hai.

9th class mein maine ek story likhi thi. Phir main jab 11th class main aaya toh poetry likhne laga. Actually main padhai mein accha tha 10th mein main Bihar board ka one of the state toppers mein tha. Uss time pe mera goal tha ki mujhe state top karna hai, newspaper mein naam aayega sab mujhe pehchaan jayenge.

Lekin yeh goal achieve karne ke baad bhi mujhe khushi nahin hui. Phir maine socha ki khushi kahan hai? Phir maine stories aur poetry likhna start kiya aur mujhe writing mein mazza aane laga.

Toh tab maine decide kiya ki engineering toh karna hai but saath saath mein apni scripts develop karunga aur uske baad Mumbai chala jaunga. Phir jab engineering karne college gaya aur phir wahan pe mere writing skills aur develop hue.

Phir maine college mein – Ananaya The unparalleled naam ka ek group tha maine woh group join kiya. Phir uss group ke kaaran mujhe anchoring karna ka mauka mila . Stage shows anchor karane laga uss kaaran se college mein main kaafi popular hogaya, log aakar photos lete the mere saath toh woh mujhe kaafi accha lagta tha.

Phir kuch time baad maine apna ek YouTube channel start kiya – BackBencho. Phir maine 2013 main ek short film banayi thi uska title tha – Tohfa the gift. Uss time mee paas camera aur equipment’s nahi the toh maine kisi friend se camera le liya tha aur phir kisi aur friend ke editing software se editing ki.

Phir jab maine final edited version dekha meri short film ka toh mujhe Goosebumps hogaye the. Matlab mujhe 2 din baad anxiety attack aagaye the. Yeh sab isiliye hua ki main bohot deeply involve hogaya tha uss short film mein. Phir finally uske baad maine decide karliya tha ki mujhe actor, writer banna hai. Mujhe complete film maker banna hai.

2013 mein hi meri ek friend ne mujhe TVF ke videos dhikhaye the aur mujhe TVF ke videos kaafi pasand aaye the matlab kya content banate hai yeh log. Tvf se main bohot inspired hoon.

Tvf se toh inspire tha hi toh maine bhi apni Short film ke baad apne youtube channel ke liye 4 videos banayi thi aur college mein kaafi logon ne dekhe bhi the videos. Magar uske kuch time baad mujhe laga ki mujhe youtuber nahi banna hai. Maine abhi tak youtube pe 3 ya 4 channel banna chukka hoon. Aur har channel pe videos banane ke baad mujhe lagta the yaar mujhe yeh nahin karna hai mujhe toh films banani hai.

Isiliye main online hi writing aur filmmaking learn karta tha. Mere saare friend exams ki prepration karte rehte the aur main youtube se filmmaking seekhta rehta tha.

Phir 2015 mein maine tvf mein interview diya tha aur main shortlist bhi hogaya tha. Lekin jis din mere college ke job placement horahe the aur same time pe main tvf mein shortlist hogaya tha aur tvf mein final interview ke liye bualaya tha.

Toh main job ko toh nahin jaane desakta tha, aur mere bhai ne bhi bola ki bhai tu yeh job join karle aur TVF se baat karke dekh unko kuch time baad interview dedena. Toh woh mauka mere haath se chala gaya. Phir 2016 se 2017 tak main job karraha tha.

Phir 2017 march maine apni job se resign diya aur phir apne friend ke saath Mumbai aagaya. Mumbai mein aakar productions house ke chakkar lagata tha aur bolta tha ki mujhe assistant director banna lo. Phir aisa karte karte main ek din crime patrol mein AD bangaya.

Phir maine uss show ka kaam kiya. Phir kuch din baad mere papa ka call aaya. Papa bohot emotional the aur unhone bola ki aajao yaar tum. Apne papa se baat karne baad mein andar se toot gaya tha kyonki meri mummy ne mujhe bataya ki ghar pe sab dukhi hai kyonki tum Mumbai chale gaye ho.

Isilye main delhi chala gaya. Phir main delhi yeh soch ke gaya ki main apni koi independent film banaunga aur maine camera aur kuch equipments bhi liye the. Magar independent film toh nahi banpayi.

Phir  2018 ke end tak main job karraha aur side by side short films bhi bana raha tha. Meri ek short – The Unknown ka ek bade film festival ke liye selection bhi hue tha. Uske baad Just play naam ka ek interactive gameplay app launch hua tha. Toh uss gameplay show ka main creative director bangaya. Phir 2018 main woh gameplay waali company band hoagayi.

Ab main wapas toh IT job mein ja nahi sakta tha. Toh 2 months tak bina job ke delhi mein hi raha main.

Phir jab koi jab nahi milli toh maine apne bhai ko jhooth bola ki Mumbai mein ek job interview hai. Toh main Mumbai jaraha hoon 1 week main wapas aajaunga. Phir main Mumbai aaya aur mere ek friend ka friend tha uske flat mein main rehta tha.

Phir Mumbai mein bhi 2 ya 3 months struggle chalta raha. Maine ek show develop kiya uss show ko maine kaafi jagah pitch kiya tha. Phir mera show ek OTT platform ko pasand bhi aagaya tha but woh show ban nahi paya.

Phir kuch din baad TVF mein ek post aaya tha ki writers ki requirement hai. Toh maine wahan apply kiya. Tvf ko mail kiya aur jitna bhi kaam abhi tak kiya tha uske saare link bhi attach kardiye the aur joh maine ek feature film likhi thi 2017 mein woh bhi maine send kardiya tha.

Phir October 2018 main mera interview hua TVF mein. Mera interview Anandeshwar Dwivedi sir and Anant Singh sir ne liya tha. Phir interview accha hua aur phir se meri tvf ki journey start hui.

Tvf pe rapib content upload ho isiliye maine tvf fatafat banana start kiye. Abhishek aur ankit ke saath milkar mein tvf fatafat banata tha. Phir fatafat video ko response bhi accha milne laggaya tha.

Logon ko pata tha ki yeh video banata hai but main utna popular nahi horaha tyha. Phir ek din achanak se imaandaar Sharma character bana. Aur woh bohot popular hogaya.

Uske baad hum imaandar Sharma ke videos bohot mehnat karke likhte the. Kaafi draft likhte the.

Phir kuch din baad decide hua ki interview lena hai Pati Patni aur Woh ki cast ka. Phir imaandar Sharma ka character banker maine unka interview liya. Aur interview accha hua aur usko phir TVF ke YouTube channel pe upload kiya aur logon ko interview bohot pasand aaya. Aur wahan se imaandar interviews start hogaye.

3. Which is your favorite show, video, or series, which you written, acted or directed?

Satish – Favorite mein – Gully Cricket hai, aur Imaandaar Sharma selfie videos mein toh sab favorite hai lekin imaandar boyfriend mujhe kaafi pasand hai.

4. Do you have any dream project? 

Satish – Mujhe science fiction film banani hai. Abhi main ek science fiction show bhi develop kiya hai. As a filmmaker main kuch aisa banana chahata hoon ki logon ko hamesha yaad reh jaaye.

Maine ek feature film likhi hai jiska ka title hai. Ek Vinashati. Ek Vinashati sanskrit word hai aur Ek Vinashati matlab – 21 hota hai. Toh yeh story ek murder mystery hai 21 day ke investigation ki story hai. Toh yeh bhi ek project hai joh main banana chahata hoon.

5. Do you have role models?

Satish – Childhood mein Premchand role model the aur baad mein Anurag Kashyap sir, Gulzar sir, Christopher Nolan sir hai.

Jaise farhan Akhtar hai woh films likhte bhi hai, direct bhi karte hai aur act bhi karte hai. Toh main kuch aisehi log ko role model manta hoon. Aur agar hum digital ki baat karein toh mujhe Jeetendra Kumar, Shivankit Parihar pasand hai aur Naveen Polishetty bhi kaafi accha lagta hai.

6. What do you feel about the emerging trend of web series? 

Satish – Kaafi opportunities hai. Har jagah web series ban rahi hai kaafi actors, actresses ko kaam milraha hai. Digital ke kaaran kaafi kuch change hua hai. Webseries , short films bohot opportunity hai. Aur single you-tubers ke liye bhi kaafi accha time hai.

7. Apart from film-making do you have an interest in sports or any other field? 

Satish – Bachpan mein har koi cricketer banna chahata hai. Main bhi cricketer banna chahata tha. Cricket mujhe bohot pasand hai.

8. Share some suggestions for the upcoming actors and actresses?

Satish – Sabse pehele main sab se yeh kehna chahata hoon ki kudh pe bharosa rakho. Duniya kuch bhi bole ki tum nahi karsakte unki mat suno tum khud par bharosa rakho tum karsakte ho, tum apna goal zaroor achieve karoge. Aur consistent raho joh bhi karrahe ho usmein consistent raho.

9. What is your biggest dream?

Satish – Sabse bada sapna yeh hai ki acchi films banani hai, acchi acting karni hai aur acchi stories likhna hai.

10. What are your upcoming projects?

Satish – Abhi toh ek show develop karaha hoon. Science fiction show hai. Aur Imaandar Sharma ke videos aane waale hai.  Aur main 2020 ya 2021 tak standup comedy bhi try karna chahata hoon.

We had a great interview with Satish & We wish him all the best for his upcoming film projects.